Vaşinqton və Moskvadakı vəziyyətin düzəlməsi üçün nələr edilməlidir? | Peskovdan mühüm açıqlama

“Moskva və Vaşinqton arasında nadir mineralların çıxarılması üzrə birgə layihələrə dair heç bir sənəd imzalanmayıb”.

Bu sözləri Rusiya Prezidentinin mətbuat katibi Dmitri Peskov bildirib.

O, iki ölkə arasında qarşılıqlı sanksiyaların hələ də qüvvədə olduğunu xatırladıb.

“Xeyr, heç bir sənəd imzalanmayıb. Bilirsiniz ki, sanksiyalar və ABŞ şirkətlərinə qoyulan məhdudiyyətlər hələ də qüvvədədir”, – deyə Kremlin sözçüsü vurğulayıb.

Eyni zamanda D.Peskov Rusiya və ABŞ bizneslərinin birgə layihələrdə qarşılıqlı marağının artması məsələsini də vəziyyətin yaxşılaşdırılması kimi qiymətləndirib.

“Münasibətlərimizin ən pis həddə çatmasından sonra bu situasiyanın yaxşılaşmasının ilkin mərhələsidir”, – deyə o qeyd edib.

D.Peskovun sözlərinə görə, vəziyyətin düzəlməsi üçün ciddi səylər göstərilməlidir. Bundan əlavə, Kremlin sözçüsü Vladimir Putinin ABŞ-li həmkarı ilə təmaslara tamamilə açıq olduğunu bəyan edib.

O bildirib ki, əgər lazım gələrsə, V.Putinlə D.Trampın telefon danışığı operativ şəkildə təşkil olunacaq. Kremlin sözçüsü Rusiya liderinin qrafikində D.Trampla telefon danışığının hələ ki olmadığını bildirib.

“Hazırda planlaşdırılmış telefon danışığı yoxdur. Lakin Prezident V.Putin ünsiyyətə açıqdır. Əgər ehtiyac olsa, bu məsələ qısa bir vaxtda razılaşdırıla bilər”, – deyə Rusiya rəsmisi vurğulayıb.