Heydər Əliyev prospektindəki qəzada yaralananların vəziyyəti | Yeni detallar

Paytaxtın Nizami rayonu, Heydər Əliyev prospekti ilə Ələsgər Qayıbov küçəsinin kəsişməsində yol-nəqliyyat hadisəsi baş verib. Qəza nəticəsində bir nəfər xəsarət alıb.

Dövlət Yol Polisi İdarəsindən bildirilib ki, hadisə BYD markalı avtomobilin sürücüsünün idarəetməni itirməsi nəticəsində baş verib.

Hadisə nəticəsində Ələsgər Qayıbov küçəsi ilə hərəkətdə olan BYD markalı avtomobil Heydər Əliyev prospekti istiqamətində hərəkətdə olan "Ford" markalı avtomobilə çırpılıb. BYD-nin sürücüsü, 51 yaşlı Anar Nəcəfov xəsarət alıb. Əraziyə DYP əməkdaşları cəlb olunublar. Faktla bağlı araşdırma aparılır.

Tibbi Ərazi Bölmələrini İdarəetmə Birliyindən verilən məlumata əsasən, yol-nəqliyyat hadisəsi zamanı Sabunçu Tibb Mərkəzinə iki nəfər hospitalizasiya olunub.

"Döş qəfəsinin əziyi diaqnozu təyin edilən 1976-cı il təvəllüdlü qadın cinsli şəxsə zəruri tibbi xidmətlər göstərilib. Vəziyyəti qənaətbəxş olan şəxs ambulator müalicəyə buraxılıb. 1974-cü il təvəllüdlü kişi cinsli şəxsə sol dizin kəsilmiş yarası diaqnozu təyin edilib. Hazırda müalicəsi davam etdirilir, vəziyyəti stabildir", – deyə məlumatda bildirilib.