Talassemiyalı xəstələri aldadanlar ifadə verməkdən yayınır

Talassemiyalı uşaqlar üçün toplanmış vəsaiti dələduzluq yolu ilə ələ keçirməkdə təqsirləndirilən Nuridə Seyidova, Aynur Bayramova və Aysel Məmmədovanın cinayət işi üzrə növbəti məhkəmə prosesi keçirilib.

Bakı Ağır Cinayətlər Məhkəməsində hakim Azad Məcidovun sədrliyi ilə baş tutan prosesdə təqsirləndirilən Aysel Məmmədovanın ibtidai istintaqa verdiyi ifadəsi elan olunub.

O, istintaq zamanı verdiyi ifadəsini təsdiq etmədiyindən ona məhkəmədə sərbəst ifadə verməyə imkan yaradılmasına baxmayaraq, xəstə olduğunu deyərək bundan imtina edib.

Məhkəmə digər təqsirləndirilən Nuridə Seyidovaya da sərbəst ifadə verməyi təklif edib. Nuridə Seyidova da həmçinin səhhəti ilə bağlı ifadə verə bilməyəcəyini və buna görə növbəti prosesədək vaxt istəyib.

Zərərçəkənlərdən Şahid Mövsümov məhkəmənin diqqətinə çatdırıb ki, təqsirləndirilən şəxslərin pullarını aldıqları uşaqlardan 3-ü vaxtında müalicə olunmadığına görə artıq vəfat edib. Hətta həmin uşaqlardan birinin valideyni də övladının ölümündən sonra dünyasını dəyişib. Təqsirləndirilənlər həmin şəxsdən də 25 min dollar alıb.