Xəstə uşaqların pulunu mənimsəyən rəhbər və işçilərinin məhkəməsində dəhşətli detallar

Talassemiyalı uşaqlar üçün toplanmış vəsaiti dələduzluq yolu ilə ələ keçirməkdə təqsirləndirilən Nuridə Seyidova, Aynur Bayramova və Aysel Məmmədovanın cinayət işi üzrə növbəti məhkəmə prosesi keçirilib.

Bakı Ağır Cinayətlər Məhkəməsində hakim Azad Məcidovun sədrliyi ilə keçirilən iclasda özünü iş üzrə zərərçəkmiş sayan Şövkət İsayevanın məhkəməyə müraciət etdiyi bildirilib.

O, Şəbnəm adlı xanımın şahidliyi ilə təqsirləndirilən Aysel Məmmədova və Nuridə Seyidovaya 90 min dollar verdiyini iddia edir. Buna görə də təqsirləndirilən şəxslərdən şikayətçi olduğunu vurğulayaraq ödədiyi pulu geri istəyib. Hakim Azad Məcidov isə Şövkət İsayev tərəfindən məhkəməyə mülki iddia təqdim edilmədiyindən onun bu iş üzrə zərərçəkmiş şəxs kimi tanınmadığını bildirib.

Daha sonra təqsirləndirilən Aysel Məmmədova vəkillərin suallarını cavablandırıb. O, 2002-ci ilin avqustunda Nuridə Seyidovanın rəhbərlik etdiyi şirkətdə çalışmağa başladığını bildirib. Bununla yanaşı, o, təmsil etdiyi şirkət tərəfindən 4 nəfərin Türkiyədə, 6 nəfərin isə Bakıda əməliyyat olunduğunu deyib. Bakıda əməliyyat olunanlardan ikisinə qaraciyər köçürülüb, bir nəfər beyin əməliyyatı olub, üç nəfərə isə böyrək köçürülüb.