Azərbaycan Suriyanın quruculuğunda niyə iştirak edir?

“Azərbaycan hazırda Suriya məsələsində də ciddi şəkildə söz sahibidir”.

Bunu Baku TV-nin departament rəhbəri, jurnalist Turan İbrahimov deyib.

O bildirib ki, Azərbaycan həm qarşılıqlı əlaqələr səviyyəsində, həm də müttəfiqləri və təşkilatlarda tutduğu həlledici rol səbəbi ilə dünyanın istənilən nöqtəsində müəyyən proseslərə bu və ya başqa şəkildə təsir edir:

“Tez-tez biz eşidirik ki, Azərbaycan Suriyanın yenidən qurulmasında ciddi şəkildə rol oynayır. Bu həm də müəyyən bir siyasətin ictimaiyyətə əks olunması deməkdir. Bəli, Azərbaycan-Türkiyə müttəfiqliyi, ölkəmizin Türk Dövlətləri Təşkilatındakı mövqeyi, Pakistan ilə münasibətləri, həmçinin Rusiya ilə strateji müttəfiqlik səviyyəsində olan əlaqələri buna gətirib çıxarır”.

Jurnalist qeyd edib ki, Azərbaycanın Yaxın Şərqdəki rolu Türkiyə-Azərbaycan ittifaqı kontekstindədir:

“Bundan əlavə, Azərbaycan-İsrail münasibətləri də olduqca vacibdir. Bu məqamda, əslində, Suriyada qurulacaq dövlət və dövlətçilik yanaşmasında Azərbaycanın mövqeyi həm də onunla əhəmiyyətlidir ki, Türkiyə və İsrail bu proseslərdə olduqca maraqlıdır. Azərbaycanın hər iki müttəfiqi bu proseslərdə istənilən məqamlarda daha effektiv irəliləmək üçün ölkəmizin yardımına ehtiyac duyurlar”.