Bakı və Tbilisi rəqəmsal icazə sisteminə keçib | Kağız sənədlərə ehtiyac endirilir - Baku TV

Gürcüstan və Azərbaycan beynəlxalq avtomobil yükdaşımaları üçün elektron icazələrin verilməsi və mübadiləsi prosesinə başlayıb.

Bu barədə Gürcüstanın İqtisadiyyat və Davamlı İnkişaf Nazirliyi məlumat yayıb.

Bildirilib ki, beynəlxalq yükdaşımaları həyata keçirən Gürcüstan daşıyıcıları artıq Türkiyədə olduğu kimi, Azərbaycanda da elektron icazələrdən istifadə edəcəklər.

Qeyd olunub ki, analoji sistem 2026-cı il iyulun əvvəlindən Türkiyə ilə daşımalarda da tətbiq edilir.

Nazirliyin Quru Nəqliyyatı Agentliyinin direktoru Bakur Mikadzenin sözlərinə görə, rəqəmsal sistem inzibati prosedurları sadələşdirir, məlumat mübadiləsini sürətləndirir və kağız sənədlərə ehtiyacı minimuma endirir.

O bildirib ki, elektron icazələrin verilməsi və monitorinqi beynəlxalq yükdaşımalarının idarə olunmasını daha şəffaf və səmərəli edir, daşıma əməliyyatlarının icra müddətini əhəmiyyətli dərəcədə azaldır.

Məlumata görə, Gürcüstan və Azərbaycan arasında əldə olunan razılaşmaya əsasən, 2026-cı il üçün bütün növ icazə sənədləri üzrə 1000 elektron icazə mübadiləsi həyata keçiriləcək. 2027-ci ildən isə sistemin tam rəqəmsal formata keçirilməsi planlaşdırılır.