Biz qardaş Azərbaycanla qarşılıqlı əlaqəmizi davam etdirəcəyik | Aleksandr Şpakovski

"Belarus Ermənistanın Baş naziri Nikol Paşinyanın Minsklə bağlı impulsiv bəyanatlarını sakitliklə götür-qoy edir".

Bu barədə Belarusun Rusiyadakı səfirliyinin müşaviri Aleksandr Şpakovski bildirib.

Onun sözlərinə görə, ölkəsi Ermənistandakı daxili siyasi proseslərə, eləcə də İrəvanın xarici siyasətinə qarışmır:

"Eyni zamanda tərəfdaşların və müttəfiqlərin seçimi rəsmi Minsk üçün suveren məsələdir və bu halda "ya o, ya da bu" yanaşması bizim üçün qəbuledilməzdir. Biz qardaş Azərbaycanla bütün sahələrdə, o cümlədən, hərbi-texniki sahədə qarşılıqlı əlaqədə olmuşuq və bundan sonra da bu əlaqələri davam etdirəcəyik", – deyə A.Şpakovski bildirib.

Qeyd edək ki, Ermənistanın Baş naziri Nikol Paşinyan hökumətin iclasında çıxışı zamanı bildirib ki, Aleksandr Lukaşenko ölkənin prezidenti olduğu müddətdə Belarusa heç vaxt səfər etməyəcək, digər Belarus rəsmilərinin də səfərini qadağan edəcək. Çünki Minsk Kollektiv Təhlükəsizlik Müqaviləsi Təşkilatının üzvü olduğu halda 44 günlük müharibədə Azərbaycanı dəstəkləyib.