Erməni bloger "Baku TV"nin reportajından danışdı

Bu günlərdə Xankəndində yaşayan erməni separatçı, bloger Artur Osipyan Rusiya sülhməramlılarının komandanı Aleksandr Lentsova məktub yazaraq ondan “humanitar böhrana” etiraz edən bir qrup nümayişçini müşayiət etmələrini xahiş edib.

Qeyd edək ki, A.Osipyan Xankəndində aclıq və ərzaq qıtlığı ilə bağlı həyəcan təbili çalanlardan biri idi. Lakin maraqlısı odur ki, o, avqustun 10-da videomüraciət edərək separatçı rejimdən Qarabağda insanların aclıqdan ölməsi yalanını, səfil və acınacaqlı vəziyyətdə uşaqların fotolarını paylaşmağı dayandırmağı tələb edib.

A.Osipyan hətta bir müddət əvvəl Baku TV-nin jurnalistinin Xankəndindəki elit restoranlardan birində 15 nəfərlik banket sifariş etdiyini də xatırladıb: “Qarabağda ərzaq qıtlığı ilə bağlı problemlər var idi. Amma burada aclıq olduğunu deyib, yeməyə heç nəyi olmayan uşaqları göstərmək yalan məlumatdır. Əgər biz bu mövzunu şişirtmək və bu cür məlumatları bütün dünyaya yaymaq istəyiriksə, bu, bizim üçün böyük biabırçılıqdır. Çünki həm ac qalmaq, həm də restoranlarda ziyafət vermək olmaz. Hətta azərbaycanlı jurnalistlər də telefonla zəng edib bizim restoranlarda banket sifariş edirlər”.

“Restoranlarımız açıqdır və fəaliyyət göstərir. Yalandan uşaqların aclıqdan ölməsi xəbərini yaymaq lazım deyil. Bəli, iki uşaq ölüb, amma aclıqdan yox. Dünya qarşısında özümüzü biabır etməyək. Heç kim belə yalanlara inanmır”, – deyə A.Osipyan qeyd edib.