Qarabağda təxribat törətmək istəyən separatçıya sərt sözlər

Qarabağda müvəqqəti yerləşdirilən Rusiya sülhməramlılarının şərti sərhəddə ermənilərin keçirməyə hazırlaşdıqları etiraz aksiyasında separatçıları müşayiət etmək və təhlükəsizliklərini təmin etməkdən rəsmən boyun qaçırması onları qəzəbləndirib.

Belə ki, sülhməramlı kontingentin baş komandanının müavini polkovnik Sazonovun imzası ilə yazılan məktubda bildirilib: “İstinad etdiyiniz müxtəlif informasiya resurslarında KİV-lər tərəfindən yayılan xəbərlər regiondakı real vəziyyəti əks etdirmir. Sülhməramlı və Rusiya Federasiyasının Qarabağ məsələsində rəsmi mövqeyinə qarşı təxribat xarakteri daşıyır”.

Bu rədd cavabını həzm etməyən separatçıların nümayəndəsi Artur Osipyan isə deyib: “Əgər ruslar bizi rədd etdilərsə, o zaman biz özümüz Həkəri körpüsünə getməyə hazırıq”.

Baş verənlərin məntiqinə aydınlıq gətirən erməni fəal İşxan Verdyan Artur Osipyanı axmaq adlandırıb: “Düzünü desəm, bu insanın davranışı heç bir məntiqə sığmır. Hazırkı vəziyyətdə Azərbaycanın ərazisində olduğu halda Azərbaycan rəsmi dairələrinə qarşı nifrət şüarları səsləndirməsi, oradakı erməniləri ayağa qaldırmağa çalışması, siyasi manipulyasiya aparması çox qəribədir.

Düşünürəm ki, axmaqdır. Dərk etmir ki, aqibəti necə ola bilər. Çünki Azərbaycan bu məsələlərə ciddi yanaşır və o, bundan qorxmursa, demək ya axmaqdır, ya da kiməsə arxalanır və hesab edir ki, kimlərinsə köməyi ilə Qarabağdan məsuliyyət daşımadan çıxa biləcək. Bu insanın hərəkətlərini başa düşmək mümkün deyil. Bu gedişlə o, özünə qəsd edəcək”.