Moskvadan sərhəddəki təxribatla bağlı açıqlama

Rəsmi Moskva Ermənistan-Azərbaycan şərti sərhədində baş verən hadisədən narahatdır.

Rusiya Xarici İşlər Nazirliyinin rəsmisi Mariya Zaxarova belə deyib.

“Biz Bakı və İrəvanı təmkin nümayiş etdirməyə, gərginliyin azaldılması üçün addımlar atmağa və vəziyyətin daha da pisləşməsinə səbəb ola biləcək hərəkətlərdən çəkinməyə qətiyyətlə çağırırıq. Ortaya çıxan bütün məsələlər yalnız sülh, diplomatik yollarla həll edilməlidir.

Baş verənlər bir daha təsdiq edir ki, Azərbaycan və Ermənistan 2020-2022-ci illər arasında yüksək səviyyədə bağlanmış üçtərəfli sazişlər kompleksinin həyata keçirilməsinə tezliklə qayıtmalıdır. Azərbaycan və Ermənistan arasında dövlət sərhədinin delimitasiyası ikitərəfli komissiyalar çərçivəsində həll edilməlidir. Biz bu prosesə məsləhətçi qismində yardım göstərməyə hazırıq”, – o bildirib.

Qeyd edək ki, son günlər Ermənistan tərəfinin ardıcıl təxribatlara əl atması şərti sərhəddə vəziyyəti gərginləşdirib. Fevralın 12-də Ermənistan Silahlı Qüvvələrinin açdığı atəş nəticəsində Dövlət Sərhəd Xidmətinin bir əsgəri yaralanıb.

Fevralın 13-də isə Dövlət Sərhəd Xidmətinin həyata keçirdiyi “Qisas” əməliyyatı nəticəsində Ermənistan Silahlı Qüvvələrinin Qafan rayonunun Nerkin-And yaşayış məntəqəsinin yaxınlığındakı döyüş postu tamamilə darmadağın edilib, döyüş mövqeləri susdurulub.