Netanyahu: İsrailə zərər vermək istəyənlər zərər görəcəklər

İsrail Ordusu Qəzza zolağında Fələstinin “İslami Cihad” radikal qruplaşmasının 10 obyektini sıradan çıxarıb.

Ordunun mətbuat xidmətinin məlumatına görə, İsrailin Müdafiə Qüvvələri qruplaşmaya məxsus 6 hərbi obyekti vurub, onların əksəriyyəti bu terror təşkilatının silah anbarları və logistika infrastrukturu kimi istifadə edilib.

İran isə İsrailin Qəzzaya qarşı hücumları qarşısında beynəlxalq təşkilatların və Qərb ölkələrinin səssizliyi və hərəkətsizliyini pisləyib. Ölkənin Xarici İşlər Nazirliyinin sözçüsü Nasser Kənani bildirib ki, hücumlarda Fələstin müqavimət hərəkatı "İslami Cihad" liderləri ilə yanaşı, qadın və uşaqların da həyatına son qoyub.

Ötən həftə həm də İsrailin molla rejiminin iki gənci edam etməsinə münasibət bildirməsi gərginliyi artırıb. Çünki açıqlamada “Bəşəriyyətin və azadlığın düşməni olan İslam Respublikası daha iki gənci asıb. Çünki onlar cinayətkar İslam Respublikasının ideyalarını qəbul etmirdilər. Dünya bu qətl maşınını dayandırmalıdır”, – kimi fikirlər səsləndirilir.

Bir sözlə, İsrail və İran arasında “atışmalar” bir xeyli intensiv hal alıb. Hətta vəziyyət o yerə çatıb ki, İsrail tərəfi İranla müharibə ehtimalını da mümkün görür. Baş nazir Benyamin Netanyahu İsrailin təhlükəsizlik problemlərinin 95%-nin İrandan qaynaqlandığını deyib. İranın bir neçə cəbhədə İsrailə qarşı müharibə cəhdinə görə mübarizə apardıqlarını ifadə edən Netanyahu “İranın ətrafımızda terror cəbhələri yaratmasının qarşısını almaq üçün əlimizdən gələni edəcəyik”, – deyə sözlərinə əlavə edib.