Paşinyan Sankt-Peterburqda İlham Əliyevlə söhbət imkanını əldən vermədi

Dekabrın 26-da siyasi gündəmi zəbt edən əsas hadisələrdən biri Rusiyanın Sankt-Peterburq şəhərində keçirilən MDB dövlət başçılarının qeyri-rəsmi sammiti olub.

Prezident İlham Əliyev də rusiyalı həmkarı Vladimir Putinin dəvəti ilə həmin tədbirə qatılıb. Sammitdə diqqətçəkən digər məqam uzun zamandır KTMT-nin toplantılarına qatılmayan Ermənistanın Baş naziri Nikol Paşinyanın Sankt-Peterburqdakı görüşə təşrif buyurması olub.

Tədbir çərçivəsində N.Paşinyan ayrı-ayrılıqda Vladimir Putinlə və Prezident İlham Əliyevlə ayaqüstü söhbət imkanını da əldən buraxmayıb. Ermənistan hökuməti tərəflər arasında təmasların olduğunu açıqlayıb. Liderlərin sülh gündəmindəki məsələləri müzakirə etdikləri vurğulanıb.

Rusiyalı hərbi ekspert Yevgeni Mixaylov Baku TV-yə açıqlamasında bildirib ki, dekabrın 26-da baş tutan görüş müsbət qiymətləndirilir, müəyyən ilkin razılaşmalar əldə olunacaq:

“Avrasiya İqtisadi İttifaqı Ermənistan üçün əhəmiyyətlidir və buna görə də N.Paşinyan sammitə qatılıb. Avrasiya puldur, iqtisadiyyatdır, ermənilər isə pulu sevirlər, saymağı bacarırlar, uğrunda bir çox yola əl atırlar. Onu da vurğulamaq yerinə düşər ki, Ermənistan üçün kənd təsərrüfatı bazarının 90%-ni Rusiya təşkil edir.

Rusiyadan Ermənistana pul axınının sürəti getdikcə artır. İlham Əliyevlə N.Paşinyanın əl-ələ görüşməsi və qısa söhbət etmələri təkcə sammitdə iştirak edənlərin deyil, həm də Ermənistanda olanların diqqətini çəkib”.

Onun sözlərinə görə, bu görüşdən sonra Vladimir Putin əlindən gələni edəcək ki, Ermənistan tərəfi öncədən razılaşdırılmış, üzərinə düşən öhdəlikləri yerinə yetirsin:

“Sülh müqaviləsinin imzalanması üçün bunlar tamamlanmalıdır. Söhbət ilk olaraq Zəngəzur dəhlizinin açılmasından gedir. Hazırda Ermənistanın Qərb tərəfdaşları bunun qarşısını alır. Onların öz istəkləri var. Müqavilənin imzalanması məsələsini gecikdirirlər. Moskva, əlbəttə ki, tədbirlər görəcək, lakin qərar Azərbaycan, Rusiya, Ermənistan, Türkiyə və İran arasında razılaşdırılıb verilməlidir. Bunlar region ölkələridir.

Qərb isə buradan uzaqdır və onun sülh müqaviləsi variantları heç kəsi maraqlandırmır. Biz görürük ki, Azərbaycan Amerikanın, Fransanın, Avropa Birliyinin davranışlarına, təzyiqlərinə necə müqavimət göstərir. Amma Ermənistan buna müqavimət göstərmir, hər şeydən razıdır”.

Yevgeni Mixaylov onu da bildirib ki, Fransa və digər Qərb ölkələri əllərini Ermənistanın üzərindən çəksələr, təzyiqlər göstərməsələr, Nikol Paşinyan yenidən Rusiyaya sığınacaq və sülh müqaviləsinin imzalanması üçün tələb olunan şərtləri qısa zamanda yerinə yetirəcək.