Paşinyandan diqqətçəkən Qarabağ açıqlaması | KTMT küskünlüyü İrəvanı düz yola gətirdi?

“Əvvəl düşünürdük ki, təhlükəsizliyin əsas alətləri hərbi-siyasi əlaqələr və ordudur. Amma tarix göstərdi ki, bu formul işləmir. Kollektiv Təhlükəsizlik Müqaviləsi Təşkilatı (KTMT) bəyan etdi ki, Azərbaycan da Ermənistan kimi qardaş ölkə sayılır, həm də təşkilat Azərbaycanın ərazi bütövlüyünü tanıyır”.

Bu sözləri Ermənistanın Baş naziri Nikol Paşinyan “Kompleks təhlükəsizlik və dayanıqlılıq 2025” beynəlxalq konfransında səsləndirib.

Onun sözlərinə görə, KTMT Qarabağın dağlıq hissəsini də Azərbaycanın ərazisi kimi tanıyırdı. Bunu 2020-ci ilin 18 noyabr və 17 dekabr bəyanatlarında Rusiya Prezidenti Vladimir Putin də təsdiqləyib.

N.Paşinyan 2021-ci ildə KTMT-yə ünvanlanan müraciətdən də bəhs edib.

“Bəs KTMT Ermənistanın ərazi bütövlüyünü tanıyırmı? Heç bu suala cavab tapmazdan qabaq başqa sual da yarandı. Ermənistanın özü öz ərazi bütövlüyünü tanıyırmı? Bax burada danışmalı çox şey var. Əgər bir ölkə öz ərazi bütövlüyünün tanınmasını müttəfiqləri və Kollektiv Təhlükəsizlik Müqaviləsi Təşkilatından gözləyirsə, bu nə ərazi bütövlüyüdür axı?”, – deyə N.Paşinyan vurğulayıb.

Bundan başqa, N.Paşinyan bildirib ki, əgər təhlükəsizlik sırf orduya bağlıdırsa, deməli, hər an təhlükə mövcuddur. Onun sözlərinə görə, daxili təhlükəsizliyin təminatında ordunun payı ilk yox, sonuncu yerdə olmalıdır.