Prezidentin İrana mesajı ünvanına çatdı | Əhmədianın Bakı səfərinin pərdəarxası

Prezident İlham Əliyevin yanvarın 7-də yerli televiziya kanallarına verdiyi müsahibədə İranla münasibətlərə toxunması və hadisələrin inkişafını detallı şəkildə izah etməsi son zamanlar qarşı tərəfdən artan təhdid siyasətinə verilən ən güclü cavab idi.

Suriyada yaxın müttəfiqini – Bəşər Əsəd rejimini qoruya bilməyən, son 6 ayda Yaxın Şərqdəki proksi qüvvələrinə yardım əli uzatmaqda aciz qalan İran rəhbərliyinin diqqəti başqa yönə çəkmək üçün Azərbaycanı hədəf seçməsi heç bir halda cavabsız qala bilməzdi.

Ərdəbilin imamcüməsi Seyid Həsən Amulinin şəbih məclisindəki təhqiramiz fikirləri bir daha bu ölkənin informasiya siyasətini ortaya qoyur.

Bu hücumlar niyə məhz Ərdəbildən istiqamətləndirilir, bu da başqa mövzudur.

Ərdəbil Azərbaycan şəhəridir və görünür ki, İran rəhbərliyi hər dəfə Seyid Həsən Amulini danışdırmaqla Güney məsələsindən nə qədər ehtiyat etdiyini açıq şəkildə ortaya qoyur.

Həsən Amuli "əyalət mollası"dır və onun həddini aşaraq qonşu dövləti və onun rəhbərliyini təhdid və təhqir etməsi, şübhəsiz ki, özbaşına baş vermir.

Görünür ki, ali dini rəhbərliyin xeyir-duası, SEPAH-ın əmri ilə hərəkət edən bu molla cəzasız qalacağına çox arxayındır.

Prezident İlham Əliyev İranın rəhbər dairələrinə, Seyid Həsən Amulini təyin edən və danışdıranlara da konkret mesajı göndərib. Dövlət başçısı faktiki şəkildə göstərib ki, heç bir dövlətin Azərbaycan xalqına qarşı haqsız münasibəti cavabsız qalmayıb və bundan sonra da qalmayacaq.

Aydın məsələdir ki, Azərbaycana qarşı informasiya siyasəti məhz mühafizəkar dairələr, əsasən də SEPAH tərəfindən aparılır. İslahatçı cinahın nümayəndəsi Məsud Pezeşkianın prezident seçilməsindən sonra ikitərəfli münasibətlərdə müsbət irəliləyişlərin olacağı gözlənilən idi.

Prezident İranın yeni rəhbərliyinə də vəziyyətdən çıxış yolunu göstərib. Əgər İran Azərbaycanla münasibətlərin normallaşmasını istəyirsə, səfirliyimizə hücum edən terrorçu dərhal edam edilməli, Həsən Amuli vəzifəsindən azad edilərək Azərbaycandan üzr istəməli və İrandan bir daha bu kimi hücumların olmasının qarşısı alınmalıdır. Əks halda Azərbaycan da lazımi addımları atacaq.

Prezident İlham Əliyevin rəsmi Tehranı fakt qarşısında qoyması və prinsipial mövqe sərgiləməsi, şübhəsiz ki, Tehranda çaşqınlıq yaradıb. Heç təsadüfi deyil ki, ertəsi gün, yanvarın 8-də İranın Milli Təhlükəsizlik Şurasının katibi Əli Əkbər Əhmədian Bakıya gəlib. Bu səfər mesajların ünvanına çatdığını göstərir.