"Ermənistanda qalmaqallı həbslər olacaq!" - İrəvanın bu hərəkətləri aranı qatdı

Uzun müddətdir Cənubi Qafqazın siyasi mənzərəsinin rəngi tez-tez dəyişir.

Səbəb isə Azərbaycanın yaratdığı sülh şəraitindən istifadə etmək əvəzinə Ermənistanın aranı qarışdırmasıdır.

Bu qarışıq vəziyyət 44 günlük müharibədən bəri qalmaqda davam edir. Artıq bir neçə gündür region mediası Ermənistanın Baş naziri Nikol Paşinyanın bölgədəki son vəziyyətlə bağlı açıqlamalarına geniş yer verir. Lakin bu açıqlamalar daxili auditoriyanın heç də xoşuna gəlməyib.

Belə ki, Baş nazir iddia edir ki, Qarabağda 44 günlük müharibədən sonra ordunun arsenalından xeyli sayda silah-sursat müəmmalı şəkildə yoxa çıxıb.

Son nəfəsini verən separatçı qüvvələr torpaqlarımızda bizə silah tuşlamaq üçün ordudan silah oğurlayıb və bu silahlar qanunsuz yollarla Qarabağa daşınıb. Bunlar fakt olaraq media vasitəsilə yayımlansa da, təbii ki, Ermənistan tərəfindən təkzib mövqeyinə keçilir.

Hərbi ekspert Ədalət Verdiyev bildirib ki, Ermənistanda həm müharibə, həm də antiterror tədbirləri zamanı mülki əhali və terror təşkilatları yüksəkvəzifəli şəxslər tərəfindən qanunsuz olaraq silahla təmin olunub:

“Hesab edirəm ki, yaxın bir-iki ay ərzində Ermənistanda qanunsuz silah dövriyyəsi ilə bağlı yüksəkvəzifəlilərin həbsi xəbərini eşidəcəyik”.

Ermənilərin torpaqlarımızın bağrına doldurduğu minalar, kustar üsullarla hazırlanmış partlayıcılardan xalqımız hələ də əziyyət çəkir. Üstəlik, bu minaların xəritəsi də verilmir. Hazırda sülh sənədi üzərində danışıqlar gedir, prosesin yaxın zamanda bitəcəyi sadəcə ümid olaraq qalır.

Lakin bir tərəfdən də N.Paşinyan oğurlanan silahların yerini Hindistan, Şimali Koreya, Fransadan aldığı silah-sursatla doldurmağa çalışır. Belə halda isə bu alış-verişin bölgəni hara aparacağı sual altında qalır.