Xristianlıq dövrü abidələrimizə sahib çıxa bilmədik deyə, ermənilər öz adlarına çıxdılar

“Qərbi Azərbaycan Xronikası” layihəsi çərçivəsində “Xristianlıq dövrü abidələrimizə sahib çıxa bilmədik deyə ermənilər öz adlarına çıxardılar” adlı veriliş yayımlanıb.

Verilişdə tarix üzrə fəlsəfə doktoru Bəxtiyar Həsənov hayların 19-cu əsrdə Qərbi Azərbaycana köçürülməsindən sonra Azərbaycan mülkədarlarına məxsus torpaqların məhkəmə qərarları ilə əllərindən alınıb ermənilərə verilməsindən bəhs edib.

O bildirib ki, Çar Rusiyası erməniləri Azərbaycanın xəzinə torpaqlarında yerləşdirmək adı ilə o vaxt saxta məhkəmələr qurub:

“Bununla da Azərbaycan mülkədarlarının torpaqlarını erməniyə vermək üçün böyük məhkəmə oyunu başlayıb. Azərbaycanlı torpaq sahibləri illərlə müqavimət göstərsə də, rusların məhkəmə sistemi ermənilərin xeyrinə qərarlar verib. Köçürülən ermənilərin torpaq tutmaq hiyləgərliyinə çar hakimiyyəti dəstək verib.

Elə vəziyyət yaranıb ki, 12 il davam edən prosesdə məhkəmə sübut tapa bilməyib, əsas olmadan Azərbaycan mülkədarının əleyhinə qərarlar çıxarıb. Hətta ruslar köçürülən ermənilərə Azərbaycan əhalisini talayıb, dolanışıq qurmaq göstərişi də verib”.

Onun sözlərinə görə, İrandan Dərələyəz mahalına köçürülən erməniləri rusların başqa adla təqdim etmək cəhdini Həsənalı Sultan ifşa edib:

“Rus işğalından qorunmaq üçün Cənubi Azərbaycana keçən azərbaycanlıların evlərinə qanunsuz yolla ermənilər yerləşdirilirdi”.

B.Həsənov bəzi qaranlıq məqamlara da aydınlıq gətirib və deyib ki, Qərbi Azərbaycanda 200-dən çox məscidin olmasını sübut edən sənədlər var:

“Xristianlıq dövrü abidələrimizə sahib çıxa bilmədiyimiz üçün ermənilər öz adlarına çıxardılar”.