Dindarlar mənim xanımıma, qızıma qarışmasın | Ateist və ilahiyyatçının mübahisəsi - AMİN

Baku TV-nin “Amin” verilişinin yeni buraxılışı yayımlanıb.

Verilişin budəfəki sayında jurnalist Vüsal Məmmədov və ilahiyyatçı Elvüsal Məmmədovla ateizm mövzusu müzakirə edilib.

Vüsal Məmmədovun sözlərinə görə, ateizm dinin insana təklif etdiyi dünyagörüşündən imtina etmək deməkdir:

“Ateizm dünyanı idrak etməyin formalarından biridir. Hesab edirəm ki, dinin təklif etdiyi dünyagörüşü mənə yaşadığım aləmi adekvat başa düşməyə kömək etmir. Mənim üçün “personlaşmış” bir ali şəxsin yaratmadığı Kainat reallığa daha yaxındır. Onu bu şəkildə qəbul edib “biz niyə varıq, həyat niyə yaranıb?” kimi suallara cavab axtarmaq daha məntiqlidir”.

Jurnalist dinin insanı mənəvi cəhətdən tərbiyə etməsinə də münasibət bildirib:

“İnsanın özünün yaratdığı etik normalar var. Onlar dinin təklif etdiyindən daha humanist, adekvatdır və bizi daha yaxşı yönləndirə bilər. Məsələn mənə görə qadının saçının görünməməsi vacib olmayan bir tələbdir. Çünki nə etik, nə də estetik əsası var. Amma kimsə buna ürəkdən inanırsa və vacib olduğunu müdafiə edirsə, onun həyatına müdaxilə etmərəm. Amma o da mənim xanımımın, qızımın həyatına qarışıb deməsin ki, sənin saçın görünməməlidir”.

V.Məmmədovun fikirlərinə qarşılıq olaraq ilahiyyatçı söyləyib ki, heç bir dindar küçədə qadını saçını bağlamağa məcbur etmir:

“Hicabın qeyri-estetik olduğunu deyiriksə, insan əxlaqına, mənəviyyatına, uşaqların tərbiyəsinə təsir göstərən geyim tərzinə də alqış tuta bilmərik. Valideyn olaraq bizdə instinkt formalaşır ki, övladlarımızı mənəvi aşınmadan, əxlaqsızlıqdan qorumalıyıq. Bu mənada ateizm din qarşısında əl-qolu bağlı qalır. Çünki ateizmə görə obyektiv əxlaq yoxdur”.