Gələn ildən ölkəyə idxal olunan bu avtomobillər üçün aksiz vergisi artırılır

2026-cı ildən Azərbaycana gətirilən istehsal tarixi 7 ildən çox olan minik avtomobilləri üçün aksiz vergisinin artırılacağı gözlənilir.

Layihəyə əsasən, istehsal tarixi 7 ildən çox olduqda hesablanan aksiz məbləği benzin mühərrikli olanlar üçün 1,5-ə, dizellər isə 2-yə vurulacaq. Hazırda bu əmsal müvafiq olaraq 1,2 və 1,5-ə bərabərdir.

Bu o deməkdir ki, istehsal tarixi 7 ildən çox, mühərrikinin həcmi 3000 kubsantimetr olan benzinlə işləyən avtomobilin idxalı üçün aksiz vergisi 1678 manat artaraq 6714 manatdan 8392 manata, dizellə işləyən üçün isə 2798 manat artaraq 8392 manatdan 11 190 manata yüksələcək. Mühərrikin həcmi böyük olduqca aksiz vergisi üzrə fərq də artır.

İqtisadçı Rəşad Həsənov deyir ki, verginin artırılması qiymətlərə təsirsiz ötüşməyəcək:

“2026-cı ildən sonra ölkəyə idxal edilən avtomobillər bahalaşacaq. Xərc dəyəri artacaq. Bu xərclər isə avtomobillərin maya dəyərinin formalaşmasına təsir edir”.

Qeyd edək ki, 2026-cı ildən hibrid və elektromobillərin də qiymətlərində artımın olacağı gözlənilir. Ekspertlər bildirirlər ki, əlavə dəyər vergisi üzrə güzəştin müddətinin uzadılmaması bahalaşmanı qaçılmaz edəcək.