Qobuda ağlagəlməz hadisə: Tövlənin olduğu yeri məktəbə çevirdilər

Sosial şəbəkələrdə Qobu qəsəbəsindəki 3 nömrəli tam orta məktəbin həyətində tövlənin olduğu video yayılıb.

Belə ki, məktəbin yaxınlığında bir şəxs öz evini sinif otaqları kimi icarəyə verib, həyətdə isə tövlə var.

Evini icarəyə verən Vidadi Əliyev deyir ki, məktəbdə sinif çatışmadığı üçün evinin 7 otağını Təhsil Nazirliyinə icarəyə verib: “Otaqlarda hər bir şərait yaradılıb. Bu videonu yayanlar direktorun işdən çıxarılmasını istəyirlər”.

Məsələ ilə bağlı Abşeron-Xızı Regional Təhsil İdarəsindən bildirilib ki, sözügedən təhsil ocağının mövcud binasının əsaslı təmiri və əlavə korpusun tikintisi nəzərdə tutulur: “Noyabrın əvvəlində ilk olaraq 528 şagird yerlik yeni binanın tikintisi həyata keçiriləcək. Daha sonra mövcud bina əsaslı təmir olunacaq. Əlavə olaraq bildiririk ki, məktəb direktoru sinif komplektinin çox olmasını əsas gətirərək Regional Təhsil İdarəsinə bir neçə sinfin məktəbə yaxın binaya yerləşdirilməsi barədə məlumat verib. Bu, valideynlərin narazılığına səbəb olub. Bununla bağlı məktəb direktoruna inzibati tənbeh tədbiri tətbiq edilib. Uşaqlar isə məktəbə qaytarılıb və orada təhsillərini davam etdirəcəklər”.