"Bakı Yay Caz Günləri"nin ilk konserti keçirildi

İyulun 3-dən Bakıda Beynəlxalq Bakı Yay Caz Günləri başlayıb. Bu münasibətlə Heydər Əliyev Mərkəzində iki konsert proqramı təqdim olunub.

Tamaşaçılar qarşısına əvvəlcə Türkiyənin məşhur gitaraçısı Önder Focan “Meltem Ege” qrupu ilə çıxıb. Onların ifasını klassik musiqi konsertləri ilə tanınan Bakı Kamera Orkestri müşayiət edib. Orkestr fərqli ampluada çıxış edərək klassika və cazın tandemini təqdim edib.

Daha sonra pianoçu Elçin Şirinov və kvartetinin konserti olub. 4 il ərzində İsrailin tanınmış “Avişai Kohen trio”sunda çalışaraq dünyanın bir çox ölkələrində konsert proqramları ilə çıxış edən Elçin Şirinov israilli musiqiçilərlə doğma şəhərində çılğın və şıltaq caz ritmlərini səsləndirib.

İyulun 4-də isə Qremmi mükafatı nominantı, məşhur caz pianoçusu Alfredo Rodrigez triosu ilə dünya turnesi çərçivəsində cazsevərlər qarşısına çıxıb.

İyulun 5-i və 7-də isə Heydər Əliyev Mərkəzinin parkında konsert proqramları təqdim olunacaq. Pianoçu, aranjimançı, Berkli Musiqi Kollecinin professoru Giorgi Mikadze triosu ilə birgə tanınmış gürcü bəstəkarlarının caz improvizasiyalarını ifa edəcək. Elə həmin gün Azərbaycan cazının banisi olan Vaqif Mustafazadə adına 2 nömrəli Uşaq İncəsənət məktəbinin tələbələri də Heydər Əliyev Mərkəzinin parkına toplaşanlara gözəl caz axşamı bəxş edəcəklər.

Caz bayramının yekun akkordunu iyulun 7-də Oleq Lundstrem adına Caz Orkestri vuracaq.

Park ərazisindəki konsertlərə giriş sərbəstdir. Heydər Əliyev Mərkəzinin Auditorium zalındakı konsertlərin biletlərini isə şəhərin kassaları və “iTicket.az” saytından əldə etmək olar.