Taksidə əxlaqsızlıqla qarşılaşan qız : Başqa yerə sürüb...

Bakıda xanım sərnişinə əxlaqsız təkliflər edən 51 yaşlı sürücü polis əməkdaşları tərəfindən müəyyən olunaraq saxlanılıb. Onun barəsində əmələ görə inzibati icra işi aparılıb. Hazırda araşdırma aparılır.

Qeyd edək ki, sosial mediada geniş müzakirəyə səbəb olan hadisə ilə bağlı xanım sərnişini qınayanlar da olub. Onun taksi sürücüsü ilə mülayim danışması birmənalı qarşılanmayıb.

“Baku.ws” saytı xəbər verir ki, taksi sürücüsü tərəfindən əxlaqsızlığa məruz qalan xanım onu qınayanlara cavab verib: "O maşında tək idim və axşam vaxtı maşında qapılar klidli idi. Mən onunla aqressiv danışsaydım, maşını başqa yerə sürüb başıma oyun açardı. Nə qədər düşüncəsiz, zəif insanlarsınız ki, buna nə ad qoyursunuz. Rəvac verən insan heç vaxt videoçəkiliş edib, ictimailəşdirməz. Az da olsa, bir-birimizə düşmən olmayaq. Unutmayın ki, bu hadisə bütün insanların, hətta sizin xanımlarınızın da başına gələ bilər".

Taksidə baş verən hadisə ilə bağlı adiyyəti şirkət də açıqlama verib. Bildirilib ki, məsələ ilə bağlı müştəri ilə danışıqlar aparılıb. Sürücünün bu cür hərəkəti qəbuledilməzdir və servis bu barədə lazımi tədbiri görüb.