ABŞ Qırmızı dənizi qorumaq üçün beynəlxalq çağırış edib

Pentaqon rəhbəri Lloyd Ostin Qırmızı dənizdə husilərin gəmilərə hücumlarının qarşısını almaq üçün əməliyyata başlanıldığını açıqlayıb.

Bu barədə ABŞ Müdafiə Nazirliyinin saytında məlumat verilib.

L.Ostin açıqlamasında vurğulayıb ki, əməliyyat Qırmızı dənizin cənubunda və Ədən körfəzində husilərin hücumlarının qarşısını almaq üçün nəzərdə tutulub.

“Son zamanlar Yəməndən husilərin ağılsız hücumlarının artması ticarətin sərbəst axınını təhdid edir, günahsız dənizçiləri təhlükə altına alır və beynəlxalq hüququ pozur. Bu, kollektiv fəaliyyət tələb edən beynəlxalq çağırışdır. Ona görə də bu gün əməliyyatın yaradılmasını elan edirəm”, – deyə bəyanatda vurğulanıb.

Məlumata görə, “Rifahın keşikçisi” adlandırılan əməliyyatda Böyük Britaniya, Fransa, İtaliya, Niderland, Kanada, Bəhreyn və Seyşel adaları da daxil olmaqla, bir çox dövlətlər iştirak edəcək.

Xatırladaq ki, Yəmənin “Ənsar Allah” üsyançı hərəkatının üzvləri İsrail və HƏMAS arasında müharibə başlayandan bəri beynəlxalq sularda gəmilərə hücum edir. Müharibədə Fələstin hərəkatını dəstəkləyən husilər İsraillə əlaqəli gəmilərə hücum edəcəklərini vəd ediblər. Bunun fonunda bir çox şirkətlər Qırmızı dəniz vasitəsilə yük daşımaqdan imtina edib.