ABŞ qüvvələri Hörmüz boğazında hərbi əməliyyata start verib - Baku TV

ABŞ Silahlı Qüvvələri Hörmüz boğazında İran limanlarının blokadası bərpa edildikdən bəri 59 kommersiya gəmisinin istiqamətini dəyişib.

Bu barədə ABŞ Silahlı Qüvvələrinin Mərkəzi Komandanlığı "X" sosial şəbəkəsində bildirib.

"Silahlı qüvvələrimiz fəaliyyətini davam etdirir. ABŞ qüvvələri blokadaya tam riayət olunmasını təmin etmək üçün 59 kommersiya gəmisini yönləndirib, üçünü sıradan çıxarıb və iki gəmiyə baxış keçirib", – deyə CENTCOM-un məlumatında qeyd olunub.

Bu arada, ABŞ Prezidenti Donald Tramp amerikalı hərbçilərin Hörmüz boğazına tam nəzarət etdiyini açıqlayıb. O bu barədə "Truth Social"da yazıb.

"ABŞ Hörmüz boğazına tam nəzarət edir. Məncə, biz bu nəzarəti qoruyub saxlayacağıq! Bizim hərbi dəniz mühasirəmiz hamı tərəfindən "polad divar" adını alıb və İran ona qarşı heç nə edə bilməz", – deyə Tramp vurğulayıb.

ABŞ liderinin sözlərinə görə, İranın hərbi dəniz donanması, hərbi hava qüvvələri sıradan çıxarılıb. O əlavə edib ki, əksər hərbi qulluqçular "maaş almırlar", İslam İnqilabı Keşikçiləri Korpusu darmadağın edilib və geri çəkilir, onların rəhbərliyi isə qeyri-müəyyən vəziyyətdədir.