Baydendən İsraildə açıqlama: HƏMAS fələstinlilərə də əzab verir

“ABŞ hər zaman İsrailin yanındadır”.

Bunu Təl-Əvivdə səfərdə olan ABŞ Prezidenti Cozef Bayden ölkənin Baş naziri Benyamin Netanyahu ilə birgə bəyanatla çıxışı zamanı deyib.

O bildirib ki, İsrail xalqının cəsarətini təqdir edir:

“Bilirsiniz, amerikalılar sizinlə birlikdə kədərlənirlər. Amerikalılar narahatdırlar, çünki bilirik ki, bu sahəni idarə etmək asan deyil. Amma fakt budur ki, İsrail bu hücumlara cavab verərkən özünün müdafiəsi üçün hər şeyi etməlidir. Bundan başqa, həm də nəzərə almalıyıq ki, HƏMAS bütün Fələstin xalqını təmsil etmir və onlara ancaq əzab verir”.

Birləşmiş Ştatlar lideri söyləyib ki, Ağ ev İsrailin müdafiəsi üçün lazım olan yardımı göstərəcək. O, həmçinin səfərinin məqsədinin ABŞ-nin İsraili dəstəklədiyini dünyaya nümayiş etdirmək olduğunu deyib.

İsrailin Baş naziri Benyamin Netanyahu isə həmrəylik üçün Ağ ev rəhbərinə təşəkkür edib. O bildirib ki, İsrail regiona sülhün gəlməsi üçün əlindən gələni edəcək.