“Gizli dünya”da nələr var? - Antarktidada aşkarlananlar dünyaya səs saldı

Xaricdən baxdıqda Antarktida soyuq və insan yaşayışına yaramayan bir məkan kimi görünür və bu əsasən doğrudur. Onun ərazisinin təxminən 90 faizi qalınlığı orta hesabla 2,2 kilometr olan buz təbəqəsi ilə örtülüdür və bu vəziyyət artıq 34 milyon ildir davam edir. Lakin onun buz örtüyünün altında tamamilə fərqli və gizli bir dünya yerləşir.

Alimlər burada müxtəlif biomlar, gizli çay və göllər, dağlar, vadilər, qədim bakteriyalar və hətta qədim ekosistem qalıqları aşkarlayıblar.

Alman alim Yohan Klaqes Antarktidanı tədqiq edərkən burada 90 milyon il əvvəl qitəni örtən mülayim tropik meşəyə aid qalıq, yəni kəhrəba tapıb. O hesab edir ki, gələcək ekspedisiyalar zamanı daha çox kəhrəba nümunəsi tapmaq mümkün olacaq.

Antarktida ərazisində 400-dən çox subbuzlaq gölü mövcuddur. Onların ən böyüyü olan Şərq gölü 4 kilometr qalınlığında buz təbəqəsinin altında, Rusiyanın "Vostok" stansiyasının yaxınlığında yerləşir.

Y.Klaqes bu göldə Yer üzündə başqa yerdə olmayan mikroorqanizmlərin ola biləcəyini istisna etmir. O əlavə edib ki, Antarktida gözəl, nəhəng və sirli görünsə də, eyni zamanda, həqiqətən, təhlükəli və qeyri-sabit bir məkandır”.