İrana cavab qərarını kim verəcək? | Nazirlər etiraz etdi

İranın hücumlarına İsrailin reaksiyasının necə olacağı ilə bağlı son qərarı verəcək şəxslər müəyyən edilib.

Bu barədə İsrail mətbuatında məlumat verilib. Bildirilib ki, İsrailin hərbi-siyasi kabineti bu vəzifəni Baş nazir Benyamin Netanyahu, müdafiə naziri Yoav Qalant və dar çərçivəli hərbi kabinetin üzvü Benni Qantsa tapşırıb.

Ölkənin milli təhlükəsizlik naziri İtamar Ben-Qvir və maliyyə naziri Betsalel Smotriç etiraz edərək belə bir qərarın geniş tərkibdə qəbul edilməli olduğunu bildiriblər. İsrailin yüksəksəviyyəli dairələri İranın hücumlarına ciddi və güclü reaksiyanın olacağını açıqlayıblar.

Bundan əlavə, ABŞ Prezidenti Cozef Bayden İranın hücumlarına cavab hazırlamaq üçün böyük yeddilik müttəfiqləri ilə məsləhətləşmələr keçirəcək.

Rəsmi Tehran isə öz növbəsində bildirib ki, İsrail cavab zərbəsi endirmək fikrinə düşsə, İranın reaksiyası daha güclü olacaq. Məlumatda əlavə edilib ki, bu, İran və İsrail arasında münaqişədir, ona görə də ABŞ buna qarışmamalıdır.