İsrail niyə bura hücuma keçdi? - Əməliyyatın arxasındakı 2 gizli səbəb

İsrail Ordusu Qəzzanın şimalında yerüstü əməliyyat keçirib.

Bu barədə məlumatı İsrailin Müdafiə Ordusu yayıb.

Əməliyyat Əş-Şucaiyyə bölgəsində başladılıb. Bildirilib ki, əməliyyatın keçirilməsində məqsəd təhlükəsizlik zonasının genişləndirilməsidir.

İsrail tərəfi iddia edir ki, Qəzzada mövcud olan yeraltı tunellərdə HƏMAS-ın hərbi komandanlığı gizlənir və onlar İsrailə qarşı yenidən müharibəyə başlamaq üçün İrandan yardım gözləyirlər.

Təl-Əvivdən verilən açıqlamadan aydın olur ki, İsrail Ordusunun əsas hədəfi bölgədə yerləşən yeraltı tunellər olacaq. Bu isə bir neçə ay, hətta bir neçə il müharibənin davam edəcəyini göstərir.

İsrailin əldə edilmiş razılaşmanı pozaraq yenidən əməliyyata başlamasının 2 əsas məqsədi var.

Birincisi, Qəzza bölgəsində yaşayan insanları oradan köçməyə məcbur etmək və bölgənin tamamilə sökülməsi barədə Donald Trampın təklif etdiyi planın həyata keçirilməsini təmin etməkdir.

Benyamin Netanyahunun rəhbərlik etdiyi hökumət bir müddət öncəki açıqlamasında da iki dövlətli həll prinsipinə çox da müsbət baxmadığını bildirib.

Fələstin dövlətinin yaradılması üçün nəzərdə tutulmuş İordan çayının sahillərində uzun müddətdir ki, yəhudi yaşayış məskənləri salınır.

Buna paralel şəkildə D.Tramp Qəzzadan əhalinin Misir və İordaniyaya köçürülməsi, bu vilayətin tamamilə sökülməsi və bu ərazidə yeni yaşayış məskənlərinin salınmasını təklif edir. Ancaq Misir, İordaniya və yerli sakinlərin bu plana qarşı çıxması işi çətinləşdirir.

İsrailin hərbi əməliyyatlarının əsas məqsədləri barədə danışsaq, HƏMAS-ın tamamilə məhv edilməsi məsələsi hər kəsə bəllidir. HƏMAS-dan başqa Qəzzada xeyli sayda fələstinli xırda silahlı qruplar da var. İsrail Fələstin Müqavimət Hərəkatının da müqavimətini sındırmaq istəyir.