Moldova Prezidenti Rusiya ilə bağlı məsələyə aydınlıq gətirdi

Moskvanın təhriki ilə Dnestryanı bölgənin Rusiyaya mümkün birləşdirilməsi ilə bağlı şayiələr yayılır.

“Jurnal TV” xəbər verir ki, bu fikri Moldova Prezidenti Maya Sandu bildirib.

“Rusiya təbliğatı belə bir qorxunc nağıl yayıb. Kreml bunu moldovalıları qorxutmaq üçün edir, xüsusən də seçki ilində olduğumuz üçün”, –M.Sandu bildirib.

Bundan əvvəl Dnestryanı bölgədə deputatların qurultayı keçirilib. Çağırış Dnestryanı bölgənin “parlament”inin rəhbəri Vadim Krasnoselski tərəfindən irəli sürülüb və buna səbəb olaraq Moldovanın bölgəyə iqtisadi təzyiq etdiyini göstərib.

Qurultayda Rusiyanın Federasiya Şurasına və Dövlət Dumasına, BMT-yə, MDB Parlamentlərarası Assambleyasına, Avropa Parlamentinə, ATƏT-ə və Qırmızı Xaç Cəmiyyətinə qətnamə və müraciət qəbul edilib.

Bunun həmən ardından fevralın 28-də Fransa Xarici İşlər Nazirliyinin sözçüsü Kristof Lemon deyib ki, Dnestryanı bölgənin Rusiyaya müraciətindən sonra Fransa digər Avropa İttifaqı ölkələri ilə birlikdə Moldovaya yardımı davam etdirəcək.

Rusiya tərəfdən də reaksiya gecikməyib. Federasiya Şurasının Müdafiə Komitəsi sədrinin birinci müavini Vladimir Çijov bildirib ki, Rusiya Tiraspolun mövcud çağırışlarına mütənasib dəstək verməyə hazırdır.