Naməlum su mənbəyi “Enigma”nı qurumağa qoymur | Maraqlı faktlar aşkarlandı

Qütb tədqiqatçılarından ibarət beynəlxalq qrup Antarktidadakı buzaltı Enigma gölünü tədqiq ediblər.

Tədqiqatçılar onun sularında mikrobiyotanın yaratdığı gizli ekosistemi aşkar ediblər.

Alimlər müəyyən ediblər ki, “Amorf” və “Boulder Clay” buzlaqları arasında yerləşən gölün donmuş səthinin altında, təxminən 11 metr dərinlikdə su təbəqəsi var. Gölün özünün dərinliyi 12 metrə çatır. Su analizi mikrobiyotanın mövcudluğunu göstərib.

Tədqiqat üçün çöl işləri 2019 və 2020-ci ilin yay mövsümündə aparılıb. İlk olaraq buz qatının altında suyun olduğunu təsdiqləmək üçün yerə nüfuz edən radardan istifadə edilib. Su nümunələri müasir mikrobioloji üsullarla sonrakı analizlər üçün laboratoriyaya götürülüb.

Mikrobiyotanı tədqiq edərkən alimlər aşkar ediblər ki, “Patescibacteria superphylum” bakteriyalarının kiçik hüceyrə və genomları var. Bu da onlara yalnız məhdud funksiyalar toplusunu yerinə yetirməyə imkan verir. Digər növ mikrobların olması ekstremal iqlimə baxmayaraq, dərinlikdə davam edən bioloji müxtəlifliyin olduğunu göstərir.

Tədqiqatın müəllifləri Enigma gölünün səthi donmadan əvvəl həyatla zəngin bir ekosistem olduğunu irəli sürürlər. Sağ qalan növlər, ehtimal ki, təcrid olunmuş mühitlərdə həyata uyğunlaşan qədim orqanizmlərin nəsilləridir.

Bundan əlavə, alimlər naməlum su mənbəyinin gölün qurumasının qarşısını adığına inanırlar. Kəşf ekstremal şəraitdə mikrobiyotanın sağ qalma mexanizmlərini və buzaltı ekosistemlərin mənşəyini daha yaxşı başa düşməyə imkan verir.