Paşinyan II Qaregini kilsədən çıxara biləcək?

“Əziz Vaqarşapat seçiciləri, sizin qarşınızda baş əyir və ilk növbədə, demokratik seçkilər münasibətilə təbrik edirəm”.

Ermənistanın Baş naziri Nikol Paşinyan “Eçmiədzin” də adlandırılan Vaqarşapatda keçirilən seçkilərin şərhinə bu sözlərlə başlayıb.

Onun “Facebook” paylaşımında qeyd olunub ki, orada rəhbər vəzifəyə “Vətəndaş Müqaviləsi” partiyasından olan namizəd Arqişti Mexakyan seçilib.

“Bu isə onu deməyə əsas verir ki, Ermənistanın sülhsevər və demokratik olması ölən böyüklərimizə ən böyük ehtiramdır. Səsvermənin nəticələri həm də müqəddəs Eçmiədzinin Ktriç Nersisyandan azad olunma prosesini sürətləndirir”, – deyə Paşinyan bildirib.

Xatırladaq ki, Paşinyan bütün ermənilərin katalikosu II Qareginə onun əsl adı ilə – Ktriç Nersisyan deyə müraciət edir, çünki Ermənistanın Baş naziri onu katalikos saymır və II Qaregin titulunu başqa keşişə vermək niyyətindədir.

Qeyd edək ki, katolikos II Qareginin qardaşı Qevork və qardaşı oğlu Ambartsum Nersisyanlar Vaqarşapatdakı seçkiqabağı təşviqata mane olmaqda ittiham olunaraq həbs ediliblər.

Nikol Paşinyanın fikrincə, Eçmiədzindəki səsvermənin nəticələrinə baxanda anlamaq olur ki, xalq 2026-cı ildə keçiriləcək parlament seçkilərində də düzgün seçim edəcək. Onu da deyək ki, İcma Şurasına seçkilər 8 siyasi gücün mübarizəsi ilə yadda qalıb və hakim partiya müxalifətə qalib gəlib.