Yeni Kaledoniyada aksiya zamanı həlak olanların sayı artdı | Vəziyyət gərginləşir
Yeni Kaledoniyada vəziyyət gərgin olaraq qalır.
Artıq uzun zamandır ki, adanın müstəqilliyi uğrunda savaşan kanak xalqının azadlığı uğrunda etiraza qalxanlardan daha bir nəfər öldürülüb. 48 yaşlı kişi fransız polisləri tərəfindən güllələnib.
Bu barədə xarici mətbuatda məlumat verilib. Bildirilib ki, adanın paytaxtı Numea prokurorluğu xəbəri təsdiqləyib. Məlumata görə, 15 nəfərdən ibarət etirazçı dəstə polis əməkdaşlarının tələblərini yerinə yetirməkdən imtina edib, həmin zaman polis kişiyə atəş açıb.
Prokurorluq “dövlət vəzifəsində olan şəxs tərəfindən qəsdən adam öldürmə” maddəsi ilə araşdırmaya başlayıb. Atəş açan polis əməkdaşı nəzarətə götürülüb. Bununla da 13 gündür etirazların davam etdiyi Yeni Kaledoniyada ölənlərin sayı 7 nəfərə çatıb. Qeyri-rəsmi mənbələrdən isə bildirilib ki, ölənlərin sayı 30-u keçib.
Qeyd edək ki, mayın 23-də adaya səfər edən Fransa Prezidenti Emmanuel Makron asayişi qorumaq üçün adada 3000 polis, xüsusi jandarma dəstəsindən 130 nəfər, zirehli texnika və helikopterin qalacağını bildirib. E.Makronun tapşırığına əsasən, Numea Beynəlxalq Hava Limanı da mayın 28-dək bağlı qalacaq.