Yeni Kaledoniyadan Fransaya qarşı təcili bəyanat | Ölənlərin sayı açıqlandı

Fransa hökumətinin vəhşiliklərinə etiraz əlaməti olaraq Yeni Kaledoniyanın Azadlıq Cəbhəsi bəyanat yayıb.

Bəyanatda qeyd edilib ki, Fransa Silahlı Qüvvələri sentyabrın 19-u yenidən Yeni Kaledoniyada dinc nümayişçilərə qarşı odlu silahdan istifadə ediblər. İki mülki şəxs güllələnib, onlardan biri ölüb, digəri ağır yaralanıb.

Eyni zamanda Fransa idarəçiliyinə qarşı Martinikdə də etirazlar başlayıb. Fransa hökuməti Yeni Kaledoniyada olduğu kimi Martinikdə də komendant saatı tətbiq edib.

“Pyer Deklerkin üstü açılmamış qətlindən 43 il, Viktor əməliyyatından isə 36 il sonra tarix təkrarlanır. Kanak Sosialist Milli Azadlıq Cəbhəsi insanları öldürməkdən çəkinməyən hüquq-mühafizə orqanlarının istifadə etdiyi barbar və alçaldıcı üsulları pisləyir. Bu ölümlərin sayı 2024-cü ilin may ayından bəri getdikcə artır. Artıq 13 nəfər həyatını itirib. Biz ölkəmizin cənubunda, xüsusən də Sent-Luis qəsəbəsində hərbi müdaxilələrin dərhal dayandırılmasını tələb edirik. Kanak xalqının soyqırımına son qoyulmalıdır”, – deyə bəyanatda qeyd olunub.

“Kanak Sosialist Milli Azadlıq Cəbhəsi əhalini ağrılara və təxribatlara baxmayaraq, zorakılığa təslim olmamağa çağırıb. Numea sazişində götürülmüş öhdəliklərə uyğun olaraq Kanak xalqının tam suverenlik üçün istəklərinə cavab vermək üçün ölkəmizin gələcəyi ilə bağlı danışıqları yenidən başlamaq vacibliyini ifadə edirik”, – deyə bəyanatda vurğulanıb.