30 ildir qazsız qalan kənd | “Oduna pul vermək bir yandan, cərimə bir yandan...”

Ağcabədinin Poladlı kəndində 30 ildən artıqdır ki, sakinlər mavi yanacaq üzünə həsrət qalıblar.

Sakinlər qışın soyuğuna ya odunla, ya da alınan maye qazla sinə gərməyə çalışırlar. Bəziləri isə meyvə ağaclarını belə kəsib yandırmağa məcbur qalıb. Dəfələrlə aidiyyəti qurumlara müraciət edilsə də, hər dəfə “tezliklə sizin kəndə qaz veriləcək” cavabını eşidiblər. Amma bu vəd yalnız sözdə qalıb.

“Qurumlara müraciət etmişik, amma illərdir bizi aldadırlar. Səbəbin nə olduğunu hələ də anlaya bilmirik. Bizə bu məsələdə kömək göstərilsə, çox yaxşı olardı”, – sakinlərdən biri narazılığını belə ifadə edib.

“Qışı keçirmək üçün odun kəsib gətiririk, amma bu zaman bizi cərimələyirlər. Həm oduna pul vermək, həm də cərimə ödəmək bizim üçün çox ağırdır”, – başqa bir sakin bildirib.