"Arxamca düşüb yalvardı" | Biznesləri batdı, ciblərində 5 manat qaldı, sonra isə... - ARZUNUN VAXTI

“Arzunun vaxtı” verilişinin budəfəki qonaqları Fərhad Abdurəhmanov və Aysel Abdurəhmanova cütlüyü olub.

Onlar tanışlıq hekayələrindən, bir-birlərinə olan böyük sevgilərindən və birlikdə aşdıqları çətinliklərdən bəhs ediblər.

Fərhad bəy həyat yoldaşı ilə eyni binada işləyərkən tanış olduqlarını, Aysel xanımı ilk gördüyü andan ondan təsirləndiyini bildirib.

O, həyat yoldaşının dürüstlüyünü, sədaqətini və çətin günlərdə göstərdiyi fədakarlığı yüksək qiymətləndirərək vurğulayıb:

“Aysel çox dürüst, təmiz və sadiq qadındır. Mənə görə çox əziyyətlər çəkib. 16 ildir birlikdəyik. Kişi heç vaxt parlayan Günəşini əriyən şamlara dəyişməz. Ona görə mən də yoldaşımı heç kəsə dəyişmərəm”.

Aysel xanım isə münasibətlərinin ilk dövrlərindən, nişanlılıq ərəfəsində Fərhad bəyin səhhətində yaranan problemdən və bu sınaqdan necə çıxdıqlarından bəhs edib.

O, yaxınlarının nişanı qaytarmaq məsləhətinə baxmayaraq, xəstəlik dövründə Fərhad bəyi tək qoymadığını qeyd edib:

“Dedilər ki, nişanı qaytaraq, sabah necə olacağını bilmirik. Amma mən dedim ki, bu, Allahın imtahanıdır, yarı yolda qoymaq düzgün deyil. Bir il müalicə olundu, sağaldı və evləndik. İndi də 3 övladımız var”.

Cütlük birlikdə sürücülük təlimi verərək fəaliyyət göstərdiklərini, bütün çətinliklərə baxmayaraq, həyatda hər şeyi çiyin-çiyinə verərək sıfırdan qazandıqlarını bildiriblər.