Azərbaycan məktəblisi 72 min dollarlıq təqaüd qazandı - Baku TV

Pirəkəşkül tam orta məktəbinin şagirdi Nilufər Şükürova dünyanın nüfuzlu ali təhsil müəssisələrindən biri olan “NYU Shanghai” Universitetinə 90 % təqaüdlə qəbul olan ilk azərbaycanlı şagird kimi tarixə düşüb.

O, yüksək akademik göstəriciləri və güclü analitik düşüncə qabiliyyəti ilə seçim komissiyasının diqqətini çəkib.

“Xaricdə oxumaq böyük arzularımdan biri idi. Altıncı sinifdən bəri müxtəlif universitetləri araşdırırdım. Bir film vasitəsilə Nyu-York Universiteti qarşıma çıxdı”, – deyə Nilufər Şükürova bildirib.

O əlavə edib ki, Amerika universitetlərinə qəbul üçün təkcə imtahan nəticələri deyil, dərsdənkənar fəaliyyətlər də nəzərə alınır:

“Buna görə mən Azərbaycan Dövlət İqtisad Universitetinin marketinq üzrə assistent professoru ilə elmi məqalə yazmışam və bir şirkətdə media və kommunikasiya üzrə təcrübə keçmişəm”.

“NYU Shanghai” dünyanın aparıcı ali təhsil şəbəkələrindən biri olan Nyu-York Universitetinin Çin Xalq Respublikasında fəaliyyət göstərən qoludur. Universitetdə tələbələrin yarısı Çindən, digər yarısı isə dünyanın müxtəlif ölkələrindən seçilərək qəbul olunur.

Nilufər Şükürova 72 min ABŞ dolları məbləğində təqaüd qazanıb. Təqaüd təhsil haqqını və digər akademik xərcləri əhatə edir.