Bu gün Azərbaycan teatrının yaranmasının 151-ci ildönümüdür

XIX əsrin 70-ci illərində Azərbaycanda milli teatrın yaranması mədəniyyətimizin tarixində çox böyük hadisə olub.

1873-cü il martın 10-da Bakı Realnı məktəbinin teatr həvəskarları truppası tərəfindən M.F.Axundzadənin “Sərgüzəşti-vəziri-xani Lənkəran” komediyası əsasında səhnə əsəri hazırlanıb. Bu tamaşa ilə Azərbaycanda milli teatrın əsası qoyulub.

Teatrımızın inkişafında məşhur xeyriyyəçi, messenat Hacı Zeynalabdin Tağıyevin də böyük xidməti olub. O, Bakı şəhərində ilk teatr binasını inşa etdirib. Azərbaycan Dövlət Teatrının yaranması isə peşəkar teatrın dövlət teatrı statusu alması demək idi. Bu teatrın pərdələri ilk dəfə 1918-ci il noyabrın 4-də N.Nərimanovun “Nadir şah” əsərinin tamaşaya qoyulması ilə açılıb.

Martın 10-nu – Azərbaycan milli teatrının əsası qoyulan günü teatrsevərlər Milli Teatr Günü kimi qeyd edirlər.