Xocavəndə növbəti köç | 135 nəfər doğma yurduna qayıtdı - Baku TV

İşğaldan azad edilən ərazilərə Böyük Qayıdış davam etdirilir.

Aprelin 30-da Xocavəndə növbəti köç baş tutub. Bu mərhələdə rayonun Xocavənd kəndinə 32 ailə olmaqla 135 nəfər qayıdıb.

Köç edənlər respublikanın müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələrdir.

Açarların təqdim edilmə mərasimində Ağdam, Füzuli və Xocavənd rayonlarında Prezidentin xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin rəsmiləri, Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin əməkdaşları iştirak ediblər.

ANAMA əməkdaşları tərəfindən ailələrə mina təhlükəsizliyi qaydaları haqqında məlumatlar verilib. Bildirilib ki, doğma yurda qayıdan sakinlər üçün bütün zəruri şərait yaradılıb.

Qeyd edək ki, Xocavənd kəndinə bu köç də daxil olmaqla ümumilikdə 277 nəfərin qayıdışı təmin edilib.