Fransa və İran XİN başçıları nələri müzakirə etdilər?

“Hörmüz boğazı yalnız İrana qarşı hərbi əməliyyatlarda iştirak edən tərəflərin gəmiləri üçün bağlıdır”.

Bunu İranın xarici işlər naziri Abbas Əraqçi fransalı həmkarı Jan-Noel Barro ilə telefon danışığı zamanı söyləyib.

“Bu su yolu İrana qarşı hərbi təcavüzdə iştirak edən tərəflərin gəmiləri üçün bağlıdır və qərar beynəlxalq hüququn prinsiplərinə əsaslanır, İrana qarşı qeyri-qanuni hücumlar həyata keçirmək üçün Hörmüz boğazından sui-istifadənin qarşısını almaq məqsədi güdür”, – deyə Əraqçi vurğulayıb.

O bildirib ki, digər ölkələrə məxsus gəmilərin hərəkəti İranın səlahiyyətli orqanları ilə razılaşdırılmaqla həyata keçirilir.

Əraqçi əlavə edib ki, ABŞ-İsrail və onların tərəfdarlarının, o cümlədən BMT Təhlükəsizlik Şurasının Hörmüz boğazındakı vəziyyətlə bağlı hər hansı təxribat xarakterli hərəkəti vəziyyəti yalnız daha da mürəkkəbləşdirəcək.

Jan-Noel Barro mülki hədəflərə qarşı hava zərbələrinin endirilməsinin tərəfdarı olmadığını, həmçinin regionda, o cümlədən Livanda vəziyyətin gərginləşməsindən narahatlığını ifadə edərək müharibəyə son qoymaq, regionda sabitlik və təhlükəsizliyi bərpa etmək məqsədilə həll yolu tapmaq üçün siyasi və diplomatik səylərin gücləndirilməsinin vacibliyini qeyd edib.