İran sənaye müəssisələrini hədəf alıb

İslam İnqilabı Keşikçiləri Korpusu Bəhreyndə "Amazon" şirkətinin bulud hesablama mərkəzinə zərbə endirdiyini bildirib.

Bu barədə "Al Jazeera" xəbər verir.

SEPAH-ın bəyanatına görə, bu hücum düşmənə ünvanlanan ilk praktiki xəbərdarlıq olub.

"Əgər xəbərdarlıqlara məhəl qoyulmasa və qətllər davam edərsə, adlarını artıq açıqladığımız növbəti şirkətləri daha sərt şəkildə cəzalandıracağıq. Bu şirkətlərin regionda tamamilə məhv edilməsinin məsuliyyəti ABŞ Prezidentinin üzərinə düşür", – deyə məlumatda vurğulanıb.

Bundan əlavə, SEPAH Bəhreyndə adanın, demək olar ki, bütün poladtökmə və metallurgiya sektorunu özündə birləşdirən Əl-Həd sənaye şəhərinə raketlər atıb. Yaxın Şərqdə hərbi münaqişə başlayandan bəri "Amazon Web Services" məlumat mərkəzləri dəfələrlə zərbələrə məruz qalıb.

Daha əvvəl SEPAH hücumlar nəticəsində İran vətəndaşlarının həlak olmasına cavab olaraq ABŞ şirkətlərinə zərbələr endirəcəyi ilə hədələmişdi.