Növbəti Oman-İran danışıqlarında əsas mövzu dəniz təhlükəsizliyidir - Baku TV

"Oman və İran nümayəndələri danışıqlar apararaq, Hörmüz boğazında gəmiçiliyin azadlığının təmin olunması prinsiplərini müzakirə ediblər".

Bu barədə Omanın xarici siyasət idarəsinin bəyanatında deyilir.

"Omanın Xarici İşlər Nazirliyinin rəhbəri Bədr əl-Busaidi və İranın XİN başçısının müavini Kazım Qəribabadinin görüşündən sonra beynəlxalq hüquq normalarına uyğun olaraq Hörmüz boğazında gəmiçilik azadlığını tənzimləyən prinsiplər toplusunu müzakirə etmək üçün Oman və İran nümayəndə heyətlərinin geniş iclası keçirilib", – deyə sənəddə qeyd olunur.

Tərəflər gəmilərin hərəkətinin, ticarətin və təchizat zəncirlərinin təhlükəsizliyinin təmin edilməsinin zəruriliyi barədə fikir mübadiləsi aparıblar.

Qeyd edilir ki, bundan əvvəl əl-Busaidi iranlı həmkarı Abbas Əraqçinin şifahi mesajını ona çatdıran Qəribabadini qəbul edib. Mesaj Pakistanın vasitəçiliyi ilə keçirilən İran-ABŞ danışıqları, eləcə də iki ölkənin Hörmüz boğazından gəmiçilik azadlığını təhlükəsiz və davamlı şəkildə bərpa etmək istəyi ilə bağlı idi.