Qatar qəzasında 14 nəfər öldü, yaralananlar var

İndoneziyada iki qatar toqquşub. Hadisə nəticəsində 14 nəfər həlak olub, 84 nəfər yaralanıb.

Şahidlər bildiriblər ki, Cakarta yaxınlığında baş verən qatar toqquşmasından sonra xaos və faciəvi mənzərə yaranıb.

Sərnişin qatarı dəmiryolu keçidində taksi ilə toqquşduqdan sonra dayanıb və bu zaman arxadan gələn ekspres qatarı ona çırpılıb. Zərbənin əsas hissəsi qadınlara məxsus vaqona dəyib və qurbanların əksəriyyəti əzilmiş metal konstruksiyalar altında sıxılmış vəziyyətdə tapılıb.

İndoneziyanın axtarış-xilasetmə xidmətinin rəhbəri bildirib ki, təxliyə əməliyyatı başa çatıb, lakin qruplar dağıntılar arasında axtarışları davam etdirəcək.

Rəsmilər bildirib ki, qəza ilə bağlı araşdırma aparılacaq. Əlavə edilib ki, ölkədə dəmiryolu şəbəkəsinin böyük hissəsi lazımi səviyyədə deyil.