Erməni fəal Vardanyanın həbsindən danışdı: Azərbaycan belə səhvləri bağışlamır!

Qarabağdakı separatçı rejimin qondarma dövlət naziri Ruben Vardanyanın həbsindən sonra onun tezliklə azadlığa çıxacağına ümid bəsləyən erməni xalqına elə erməni fəal Roman Baqdasaryandan şillə kimi cavab gəlib.

O, öz sosial media hesablarından birində xalqına çağırış xarakterli videomüraciət ünvanlayıb. Rubenin öz dilinin bəlasına düşdüyünü bildirən bloger onun həbsinin qaçılmaz olduğunu vurğulayıb: “Rubenin Rusiyaya ekstradisiyasını gözləyirsinizsə, gözünüzü bu boş ümidlərdən çəkin. Ruben elə Azərbaycanda, Bakıda həbsxanada qalacaq. Dəyərli Rubencan, bir ay öncə erməni radiosuna müsahibə verəndə bu günlərinizi düşünmədinizmi? Fikirləşmirdinizmi ki, “Azərbaycanlıları dünyanın harasında olmasından asılı olmayaraq məhv edəcəyəm” sözünü demək olmazdı? Nəzərinizə çatdırım ki, Azərbaycan belə səhvləri heç vaxt heç kimə bağışlamır. Rubenin həbsdən azad edilməsini onunla əlbir olub çirkli pulları yuyan ikiüzlü ortaqları da istəmir. Bu gün Ruben Vardanyanın ölməsini daha çox adam istəyir, nəinki yaşamasını. Rubenin həbsdən kiminsə çıxara biləcəyinə inananlar anlasınlar ki, belə şey olmayacaq”.

Qeyd edək ki, Ruben Vardanyan Azərbaycan Cinayət Məcəlləsinin "terrorçuluğu maliyyələşdirmə", "qanunvericiliklə nəzərdə tutulmayan silahlı birləşmələrin və ya qrupların yaradılmasında və fəaliyyətində iştirak" və "Azərbaycanın dövlət sərhədini qanunsuz olaraq keçmə" maddələri ilə ittiham olunur.