Fransanın xarici işlər naziri fərqində olmadan separatçıları ifşa etdi

Fransanın xarici işlər naziri Katrin Kolonna BMT Təhlükəsizlik Şurasının Qarabağdakı vəziyyətlə bağlı iclasında çıxışı zamanı fərqində olmadan erməni separatçılarının yalanlarını ifşa edərək Qarabağ əhalisinin 10%-nin artıq ərazini tərk etdiyini bildirib.

Fransalı diplomat bununla da separatçıların uydurduğu 120 min nəfərlik erməni əhali haqqında mifinə son qoyub. Onun təsadüfən səsləndirdiyi həqiqət, əslində, ölkəsinin iç üzünü, Cənubi Qafqaz siyasətindəki çirkin məqsədlərini ortaya qoydu. Bütün dünyaya aydın oldu ki, Paris uzun müddət həqiqətləri bilərəkdən təhrif edib, öz maraqları üçün Ermənistanı əlində alətə çevirib.

Qeyd edək ki, Qarabağda müvəqqəti yerləşdirilən Rusiya sülhməramlılarının məlumatına görə, son 2 gündə 5000 erməni bölgəni tərk edib və onların sayı daha da azalıb. Faktlar da onu göstərir ki, Qarabağın guya yüzminlərlə erməni sakininə qarşı absurd etnik təmizləmə iddiası cəfəngiyyatdan başqa bir şey deyil. Bu yalanı isə elə Fransanın özü ifşa edib. Çünki Azərbaycan heç vaxt dinc erməni sakinləri hədəf almayıb, onların cəmiyyətimizə reinteqrasiyasına və hüquqlarının qorunmasına hazır olduğunu dəfələrlə bəyan edib.

Azərbaycan bir daha göstərdi ki, suveren ərazilərində separatizmin mövcudluğuna göz yummayacaq. Bu reallığın isə hər kəs tərəfindən qəbul edildiyi növbəti dəfə sübut olundu. Fransa da Papadan daha çox katolik olmaq ritorikası və regiona müdaxilə siyasətindən əl çəksə, yaxşı olar. Çünki bundan ən çox əziyyət çəkən elə Ermənistan və ermənilərdir.