Laçın yolunun açılması üçün əsas şərt açıqlandı

“Azərbaycanın Qarabağ bölgəsində Ermənistanın qondarma rejiminin törətdiyi problem və təxribatlara baxmayaraq, Rusiya Qızıl Xaç Cəmiyyətinin göndərdiyi yükün Azərbaycanla əlaqələndirilmiş şəkildə məhz Ağdam-Xankəndi yolu ilə keçməsini bu yolun açılması istiqamətində müsbət addım və mühüm irəliləyiş kimi qiymətləndiririk”.

Bu barədə Xarici İşlər Nazirliyinin rəsmisi Ayxan Hacızadə Rusiya Qızıl Xaç Cəmiyyəti tərəfindən göndərilən yükün Ağdam-Xankəndi yolu ilə keçidi, habelə Ağdam-Xankəndi və Laçın yollarının eyni zamanda açılması məsələsi ilə bağlı şərhində bildirib.

Onun sözlərinə görə, Ağdam-Xankəndi və Laçın yollarından eyni vaxtda istifadə məsələsinə gəlincə, Azərbaycanın ABŞ və digər tərəfdaşlarla yüksək səviyyəli təmaslar zamanı da qeyd etdiyi kimi, ölkəmiz bu iki yoldan BQXK vasitəsilə eyni zamanda istifadə məsələsinə razılıq verib.

“Təəssüf ki, bu razılığın həyata keçirilməsinə mane olan tərəf Ermənistanın Qarabağda yaratdığı qondarma rejimdir. Rəsmi Bakı bir daha bəyan edir ki, Azərbaycan tərəfi Ağdam-Xankəndi yolu ilə paralel olaraq, “Laçın” sərhəd-buraxılış məntəqəsində müvafiq olaraq sərhəd və gömrük prosedurlarına əməl etməklə BQXK vasitəsilə yüklərin daşınmasına şərait yaratmağa hazırdır”, – deyə Ayxan Hacızadə bildirib.