Separatçılar bir-birilərini ifşa edir: qondarma rejim 1 günə necə təslim oldu?

Azərbaycanın Qarabağ iqtisadi zonasında 30 il qanunsuz mövcud olan separatçı rejimin varlığına son qoyduqdan sonra erməni mediasında bununla bağlı çoxsaylı suallar meydana çıxdı.

“Necə oldu ki, qondarma rejim bir gün içərisində ləğv olundu?” “Qondarma rejimin təcili təslimatı separatçı ermənilərdən kimlərin marağında idi?”

Bu suallara cavab vermək üçün yerli media kanallarından biri qondarma rejimin “müdafiə naziri” Samvel Babayanı studiyaya qonaq dəvət edib.

“Siz sual edirsiniz ki, niyə rejim bu qədər tez və döyüşsüz təslim edib? İcazə verin, mən bu sualı cavablandırım. Ən başlıca səbəblərdən biri Ermənistandan milyonlarla dollar və “Hayastan” fondundan 1 milyard dolların hara getdiyini göstərən bütün sənədləri məhv etmək imkanıdır. Oradakılar külli miqdarda yeyinti etdikdən sonra vəziyyətdən çıxış yolu axtarmağa başlayıb. Yaranan durum isə onlar üçün əsl fürsət oldu. Hamı yedi, hamı doydu, sonra izlərini gizlətmək üçün oranı təslim etdi. Bütün bunlar azmış kimi onlar 5 gün rəsmi mühasibat sənədlərini də yandırdılar”, – deyə S.Babayan öz müsahibəsində bildirib.

Qeyd edək ki, sentyabr ayının 28-i separatçı rejim orada olan “dövlət qurumları” və “təşkilatların” fəaliyyətini dayandırdığını bildirib. Yerli erməni əhaliyə Qarabağda qalmağın mümkünlüyü barədə müstəqil və fərdi qərar qəbul etmək məqsədilə Azərbaycan Respublikasının təqdim etdiyi reinteqrasiya şərtləri ilə tanış olmaq da təklif edilib.