Separatçılar ilə Paşinyan hökuməti qarşı-qarşıya | İrəvanda ara qarışdı

Ermənistanda vəziyyət getdikcə gərginləşir.

Azərbaycanla sülh müqaviləsinin imzalanması ərəfəsində ölkədən bir-birini təkzib edən açıqlamalar gəlir.

Nikol Paşinyan bir tərəfdən barışdan danışır, digər tərəfdən Qarabağdan qovulan keçmiş xunta rejiminin tör-töküntüləri açıqlamaları ilə aranı qızışdırır. Ancaq maraqlı tərəf ondadır ki, Qarabağın keçmiş separatçılarının lideri Samvel Şahramanyanın açıqlamalarına elə Paşinyan hökumətindən yerindəcə cavab verilib.

Ermənistanın “Mülki Müqavilə” fraksiyasının katibi Artur Hovhannisyan öz “Facebook” səhifəsində Qarabağdan qaçan “məmurları” yıxıb sürüyüb:

“Belə çıxır ki, Qarabağın təslim olmasına imza atan, bütün döyüş sursatı və texnikanı qarşı tərəfə təhvil verən, Ermənistanı müharibəyə sürükləmək cəhdinə töhfə verən qondarma prezident və onun məmurları öz hallarına üzülürlər. Onları maraqlandıran əsas məqam bundan sonra Ermənistandan maaş ala bilməmələridir.

Samvel Şahramanyan kimdir ki, İrəvanda fərman imzalasın? İrəvanda və Ermənistanda yalnız və müstəsna olaraq respublikanın qanuni rəhbərliyinin fərman və qərarları etibarlı sayılır.

Samvel kimilərinə xatırlatmaq istəyirəm ki, Ermənistan Respublikasında hakimiyyət xalqa məxsusdur, xalq öz legitim parlamentini, baş nazirini seçib, təsisatları formalaşdırıb. Buna qarşı çıxanların əməlləri isə dövlət əleyhinə fəaliyyət kimi qiymətləndiriləcək. Ermənistanı yeni hərbi təxribata cəlb etməyə çalışanların bütün planları alt-üst olacaq, onun müəllifləri ciddi şəkildə cəzalandırılacaq”.