Zakir Həsənov Vyetnamda bir sıra görüşlər keçirdi | Detallar açıqlandı

Sentyabrın 3-də Azərbaycan müdafiə naziri general-polkovnik Zakir Həsənov Vyetnam Sosialist Respublikasının Hərbi Dəniz Qüvvələri Komandanlığının qərargahında olub.

Bu barədə məlumatı Müdafiə Nazirliyi yayıb.

Əvvəlcə Hanoy şəhərində yerləşən “Qəhrəmanlar və Şəhidlər abidəsi” və Prezident “Ho Chi Minh” mavzoleyi ziyarət edilib.

Daha sonra müdafiə naziri Vyetnam Hərbi Dəniz Qüvvələri komandanı vitse-admiral Tran Thanh Nghiemlə görüşüb.

Görüş zamanı hər iki ölkənin Hərbi Dəniz Qüvvələri arasında əməkdaşlığın inkişaf perspektivləri, eləcə də qarşılıqlı maraq doğuran bir sıra məsələlərə dair ətraflı fikir mübadiləsi aparılıb.

Sonda general-polkovnik Həsənov Hərbi Dəniz Qüvvələri briqadasını və “Ha Long” buxtasını ziyarət edib, burada yaradılan şəraitlə tanış olub.

Qeyd edək ki, Sentyabrın 2-dən müdafiə naziri general-polkovnik Zakir Həsənov Vyetnam Sosialist Respublikasında rəsmi səfərdədir. General-polkovnik Həsənov Avqust İnqilabının 80-ci ildönümü və Vyetnam Sosialist Respublikasının Milli Günü münasibətilə keçirilən təntənəli mərasimdə iştirak edib.

Dövlət rəsmiləri, xarici qonaqlar və xeyli sayda vətəndaşın iştirak etdiyi Hanoy şəhərində yerləşən “Ba Dinh” Meydanında keçirilən tədbirdə Vyetnamın azadlıq uğrunda tarixi mübarizəsi xatırlanıb. Mərasim çərçivəsində əlamətdar günə həsr olunmuş hərbi parad keçirilib.