42 milyon manat kreditdən xəbərim olmayıb | "Şlyapa Zahid" hakim qarşısında

Külli miqdarda mənimsəmədə ittiham olunan Müdafiə Nazirliyinin sabiq əməkdaşı, “Şlyapa Zahid” ləqəbli Zahid Niftəliyevin cinayət işinin növbəti məhkəmə prosesi keçirilib.

Bakı Ağır Cinayətlər Məhkəməsinin hakimi Novruz Kərimovun sədrliyi ilə keçirilən proses təqsirləndirilən Zahid Niftəliyevin vəkili Əli Adığözəlovun suallarını cavablandırmaqla davam edib.

Zahid Niftəliyev “AtaBank”da onun adına rəsmiləşdirilən 42 milyon manat kreditlə bağlı məsələyə aydınlıq gətirərək vurğulayıb ki, o, belə kreditdən ümumiyyətlə xəbərsiz olub. Kreditin onun adına rəsmiləşdirilməsindən isə keçmiş vergilər naziri Fazil Məmmədovun dünyasını dəyişdikdən sonra xəbəri olduğunu deyib. Z.Niftəliyev Nəcməddin Sadıkovun göstərişi ilə sadəcə müqavilələrə imza atdığını bildirib.

Kredit götürülən müddətdə Z.Niftəliyevin adından banka müxtəlif vaxtlarda müəyyən məbləğlərin ödənilməsi məsələsinə isə aydınlıq gətirərək bildirib ki, onun banka hər hansı bir borcun ödənilməsindən xəbəri olmayıb.

“Mənim adıma saxta şirkət açaraq əməliyyatlar aparıblar. Bunu hansı vicdansız edibsə, o da cavab versin”, – deyə Z.Niftəliyev qeyd edib.

Məhkəmənin növbəti iclası noyabrın 27-nə təyin olunub.