42 milyon manatı mən yox… | ”Şlyapa Zahid”in məhkəməsində qalmaqallı məsələ

Müdafiə Nazirliyinin sabiq əməkdaşı, "Şlyapa Zahid" ləqəbli Zahid Niftəliyevin 42 milyon manatlıq mənimsəmədə ittiham olunması ilə bağlı cinayət işi üzrə ilk məhkəmə baxış iclası baş tutub.

Bakı Ağır Cinayətlər Məhkəməsində hakim Novruz Kərimovun sədrliyi ilə keçrilən prosesin ilkin mərhələsində təqsirləndirilən şəxsin vəkili şahid kimi ifadə verməsi zəruri olan şəxslərin məhkəməyə dəvət olunması ilə bağlı vəsatətlə çıxış edib. Həmin şəxslərdən biri də Müdafiə Nazirliyinin keçmiş Baş Qərərgah rəisi Nəcməddin Sadıkovdur.

Dövlət ittihamçısı Elvin Mirzəyev isə öz növbəsində bildirib ki, istintaq orqanı tərəfindən çoxsaylı şahidlərin ifadəsi alınıb.

Həmçinin əlavə edib ki, əsas şahidlər dindiriləndən sonra zərurət yaranarsa, əlavə şahidlərin dindirilməsi məsələsinə baxıla bilər. O, hazırkı mərhələdə vəsatətlərin təmin olunmamasını istəyib.

Yerində müşavirə keçirən hakimlər qərar qəbul edərək vəkilin vəsatətində qaldırılan məsələlərin, sübutların araşdırılması mərhələsi ilə bağlı olduğunu bildiriblər. Bu səbəbdən də vəsatətlər baxılmamış saxlanılıb.

İş üzrə zərərçəkmiş qismində tanınmış bankın nümayəndəsi Zahid Niftəliyevə qarşı mülki iddia qaldırıb. Daha sonra dövlət ittihamçısı ittiham aktını elan edib.

Zahid Niftəliyev ittihamlarla razı olmadığını, 42 milyon manatı başqa şəxslərin mənimsədiyini əsas gətirərək özünü təqsirli bilmədiyini deyib.

Növbəti məhkəmə prosesi sentyabrın 25-nə təyin olunub.