Ana Vətən Partiyasının rəhbərliyinə kim keçəcək? | Fəzail Ağamalının ailəsində fikir ayrılığı

Fəzail Ağamalının sədri olduğu Ana Vətən Partiyasının oktyabrın 25-də keçirilən qurultayında qalmaqal yaşanıb.

Yeni sədr postuna kimin gətirilməsi məsələsində onun övladları arasında fikir ayrılığı yaranıb.

Fəzail Ağamalı partiyaya rəhbərliyi deputat qızı Günay Ağamalıya həvalə etmək istəyib. Lakin partiya üzvlərinin bir qismi onun oğlu Elçin Ağamalının namizədliyini dəstəkləyib. Qurultayda Fəzail Ağamalı ilə oğlu arasında gərginlik yaşanıb. Mühafizəçilərin müdaxiləsi nəticəsində ata və oğul bir-birindən uzaqlaşdırılıb.

Fəzail Ağamalı “Qafqazinfo”ya bildirib ki, oğlu qurultayın reqlamentini pozduğu üçün binadan kənarlaşdırılıb:

“Öz adamları ilə birgə qurultayı pozmağa cəhd etdilər. Bu səbəbdən iclası təxirə saldıq. Elçini də binadan kənarlaşdırdılar. Mən partiya sədrliyinə qızımı təklif edirəm. Amma hələ ki özüm istefa verməmişəm. Dediyim kimi, Elçinin hərəkətlərinə görə qurultayı dayandırdıq”.

Fəzail Ağamalının oğlu isə atasının dediklərini yalanlayıb. Elçin Ağamalının sözlərinə görə, atası oktyabrın 25-də sədrlikdən istefa verib. Öz yerinə də bacısı Günay Ağamalının namizədliyini irəli sürüb. Bundan əlavə, partiya sədrliyinə daha iki namizəd olub.

“Partiya nümayəndələri mənim namizədliyimi təsdiqlədilər. 100-dən çox səslə mən sədr seçildim. Bundan sonra Fəzail Ağamalı işığı söndürdü. Mənim seçilməyimi qəbul etməyib qurultayı pozdu. Amma mən yekdil səslə yeni sədr seçilmişəm. Hər kəs də bunu təsdiq edə bilər”, − deyə Elçin Ağamalı vurğulayıb.

Elçin Ağamalı həmçinin bildirib ki, onun əlində Fəzail Ağamalının partiya sədrliyindən istefa verməsi ilə bağlı görüntülər var.